皇馬煲魚生粥預埋里

. 精彩栏目.

皇馬煲魚生粥預埋里

2011-1-13　 [大字体] [中字体] [小字体]

皇馬煲魚生粥預埋里
(文：亨格比利)

「馬德里打吡」戰火蔓延到西班牙盃！皇家馬德里同馬德里體育會兩大同市宿敵，今晚喺西盃8強首回合狹路相逢，「銀河艦隊」主帥莫連奴一向重視本土盃賽，對上兩圈亦有派遣強陣出擊，考慮到雙方近年交手都係1球上落，寧博主隊皇馬僅勝一粒開4倍嘅「讓球和」。（now632及660台周五清晨5:00直播）

有跟開西盃嘅朋友，都知皇馬絕無欺場，即使對上兩圈只係面對梅西亞同利雲特，教練莫連奴都照派卡斯拿斯、沙治奧拉莫斯同基斯坦奴朗拿度等球星落場，何況今仗係「馬德里打吡」，預計剛啱獲選為年度最佳教練嘅莫連奴喺排陣上唔會太玩嘢，務求以勝仗為自己贈興。

卡卡Fit番C朗吐烏氣

C朗喺金球獎3甲不入，畀「巴塞三子」搶盡風頭，今晚實搏盡吐烏氣。至於卡卡傷愈後表現愈嚟愈好，上仗對維拉利爾仲有波入添，「寸王」為催谷呢位巴西中場嘅狀態，賽前講明會派佢落場，鋒力絕對有保證。

對家馬體會尋日宣布簽入奧沙辛拿翼鋒桑法蘭托里斯，取代已經離隊嘅沙保沙，不過呢位皇馬青訓產品只係跟咗一課操練，今戰未必上陣。呢支首都球隊連續兩場聯賽失分，上仗仲輸畀升班隊伍靴高斯1:4，一條錯漏百出嘅防線慘受傳媒狂轟。

馬體會近12年交手冇運行

馬體會近12年面對皇馬都未威過，教練科利斯已經落咗「柯打」要守住後防，留番次回合先搶攻，今晚唔慌踢得進取。翻查往績，馬體會近6次作客皇馬輸咗4次，當中有3次僅輸1粒，「銀河艦隊」「讓球和」有4倍博得過。

皇馬主場無敵

‧今季全部14場主場賽事全勝。‧對上1次本土盃賽輸畀馬體會要追溯至92年。馬體會後防唔硬淨‧近12年遇皇家馬德里未贏過。‧近8場作客賽事只有1場保持清白之身。