. 精彩栏目.
 
 
德國轟炸機 今夜再起飛
2010-7-7　 [大字体] [中字体] [小字体]
德國轟炸機今夜再起飛
()

德國轟炸機全方位發炮，誓要夷平「鬥牛國」後防基地，打入世界盃決賽！周四凌晨四強德國鬥西班牙，德軍本屆五仗入十三球，攻力冠絕四強，高路斯更變身「超級轟炸機」，裝齊彈藥、入滿晒油，地氈式狙擊對手；但「西班牙衞隊」一班守衞亦係支支高射炮都上好晒膛，今晚全力開火掃射、誓要將德國轟炸機擊落！




德國分組賽狂勝澳洲四比○，十六強炒英格蘭四比一，八強再贈阿根廷四蛋，德軍戰機攻擊得心應手，長、短棍傳送極度致命、行軍亦非常快速，無論對手如何加設防護網，都未能抑制德軍強攻，被打得落花流水。高路斯呢隻舊款戰機，上屆世界盃已成「殺敵王」，攻入五球成為決賽周神射手，頭頂腳踢都能置對手於死地。




事隔四年，德軍「新戰機」馬里奧高美斯、卡卡奧等都已升空殺敵，但卻火候不足，效果未如理想。聞戰鼓思良將，縱使高路斯去季於拜仁已被「雪到硬」，搞到機身生銹，引擎亦幾乎撻唔着，但領隊勒夫仍對佢投以信心一票，將高路斯重新打造成「超級轟炸機」，於本屆已攻入四粒，世界盃累積入波已達十四球，追平前輩梅拿紀錄，而只要今晚再有進帳，就可追平甚至超越朗拿度入球最多紀錄。


高路斯入多兩粒破紀錄

德軍殺得性起，勁勢㩒都㩒唔住，加上兩年前歐國盃決賽輸○比一飲恨，今晚必有仇報仇施以強攻，務求連數三大頂級勁旅。「地上最強」西班牙有備而來，「世界第一門神」卡斯拿斯已做足心理準備，抵擋對手如潮炮彈。本屆西班牙攻力稍弱，鬥巴拉圭門前亦風聲鶴唳，但卡斯拿斯的確有料到，先接實奧斯卡卡度素十二碼，完場前更用腳擋出對手必入波，盡顯頂級門神功架。卡斯拿斯狀態托弗，誓堅盾上身力擋戰機狂轟！




另外，西班牙一班守衞均非善類，由碧基、卡迪維拿和沙治奧拉莫斯等組成嘅高佬陣，喺防線上同樣有制空能力，因此絕對唔驚德國轟炸機來襲。飛去約翰內斯堡踢決賽同去曼德拉灣打季軍戰嘅機票究竟點分配？踢完呢場世紀大戰自有分曉。


超級轟炸機

MiroslavKLOSE高路斯雖然喺拜仁未獲重用，但嚟到南非就着晒火，盡顯射手本色，目前只欠一球就可以追平朗拿度紀錄，成為「世盃射手王」。戰鬥轟炸機LukasPODOLSKI普多斯基勒夫契仔，實力一般但必有正選，好彩佢今屆都交到貨，靠佢攻堅未必掂，但要佢衝擊對手防線掩護高路斯就絕對OK。甩轆轟炸機MarioGOMEZ馬里奧高美斯擁有1米89嘅高度，曾一度被睇好係轟炸機繼承人，可惜技術同射術停滯不前，落場形同虛設，今仗都係「再坐一會」啦！西班牙衛隊GerardPIQUE碧基近年進步最快後衞，除防守出色，亦可以配合死球戰術上前攻堅。SergioRAMOS沙治奧拉莫斯常以右翼衞姿態參與進攻，但亦因此令西班牙右路間中出現空間。CarlesPUYOL佩奧爾路數、包位、指揮都係世界一級，惜年紀漸大，速度和轉身較慢。JoanCAPDEVILA卡迪維拿32歲高齡令佢喺今屆賽事多次出現甩漏，令左路成為對手攻擊點。IkerCASILLAS卡斯拿斯雖然今屆狀態稍有滑落，但西班牙第一門將地位仍然難以撼動。




:::相关资讯:::