. 精彩栏目.
 
 
美職明星隊攞彩冧粉絲 (樂比堅尼)
2010-7-28　 [大字体] [中字体] [小字体]
美職明星隊攞彩冧粉絲
(文：樂比堅尼)

曼聯明早於休斯敦進行美國之旅最後一場熱身賽，對手係美職明星隊。美國球迷普遍有「大美國主義」，亦即係香港網民所講嘅「勝利球迷」，贏波就捧場，輸波就拉隊離場，所以美職明星隊對外隊一向唔輸得，踢得仲認真過平時比賽。曼聯經過「馬戲團式」巡迴演出後，球員疲態畢露，表現一場差過一場，樂比仔捧2.35倍「讓球主勝」。



（now633周四早上8時30分直播）

六鬥外隊未輸過

美職明星賽自九六年成立，初時同NBA一樣由東岸對西岸，兩隊都係表演第一、比賽第二，所以出現過九比四、六比六呢類「曲棍球」比賽戰果。但自從近年開始，美職明星隊開始搵外隊嚟「祭旗」，對手包括富咸、車路士、韋斯咸及愛華頓等英超隊，結果美職明星隊喺法定時間未輸過，更取得五勝一和佳績，可見班球員絕對係搵命博，加上今次門票銷售情況相當理想，至今已出售近五萬張飛，打破十三年來嘅紀錄，所以明星隊球員肯定加多兩錢肉緊。



今次美職明星隊嘅正選陣容由球迷、傳媒、球員及教練投票選出，另外再由主教練艾連拿挑選其餘後備球員，呢份名單可以話精銳盡出，主將包括洛杉磯銀河「孖寶」艾臣布度及當路雲、紐約紅牛「天使」安祖、老牌射手程拜仁等，論星味唔會差得過曼聯。

世盃腳缺陣影響大

至於曼聯嚟咗美國之後進行密集式友賽，先後與些路迪、費城聯及肯薩斯巫師交手，除咗首仗贏些路迪三比一表現較佳外，之後兩場對費城聯及巫師表現都令人失望，主要原因係曼聯今次美國之行缺少多名世界盃國腳，另外里奧費迪南、奧雲、路爾斯安達臣及加利仔等亦因傷冇隨隊，呢隊「A貨紅魔鬼」對住高手雲集嘅美職明星隊，輸埋都唔奇！



:::相关资讯:::